Larunbatetik aurrera, Lamuza eta Doctor Fleming adinekoen zentroek ateak irekiko dituzte berriro. Osasun egoera hobera doan arren, murrizketa batzuk mantenduko dira. Horrela, zentro hauen kasuan, edukiera %50era mugatuko dute, eta, Laudioko Udalak helarazitako ohar baten arabera, bertan ez dute egingo inolako jarduera soziokulturalik. Mahai bakoitzeko lau lagun besterik ez dira egongo, eta sarreran "gel hidroalkoholikoa erabiltzeko betebeharra" ezarri du Udalak.
COVID-19a dela eta, zentroek urtebete inguru eman dute itxita, baina orain Udalak uste du birusa azaldu aurretik ematen zen zerbitzua berreskuratzeko baldintzak badirela. 11:00etatik 13:00etara eta 14:30etik 21:00etara irekita egongo dira.