Sortu berri den Zabaleko Bizirik plataformak jakinarazi duenez, Jaurlaritzako Hezkuntza Sailak Amurrioko Lehen Hezkuntzako ikastetxe publiko biak elkartu nahi ditu, Mendiko Ikastetxea eta Zabaleko Ikastetxea batuz. Azken hau Euskal Eskola Txikien Sareko partaide da.
Erabaki honen aurrean Zabaleko ikastetxeko hezkuntza komunitatea osatzen dutenek "erabateko desadostasuna eta arbuioa" plazaratu nahi izan dute: "Erabaki honek gure eskolaren amaiera dakar eta Amurrioko historiari Zabaleko ikastetxeak egindako ekarpena ahaztea. San Jose auzoarentzat eskolak izan duen eta egun duen garrantzia ezin ahaztu, auzo baten, komunitate baten ardatza da eta", azpimarratu du plataformak.
Ikastetxearen itxieraren kontra, mobilizazioak igarri dituzte. Besteak beste, sinadurak batzen hasi dira change.org plataforman.