Ostegun honetan, Tubacexeko zuzendaritzak 129 langileren kaleratze kolektiboa gauzatu du: nahitaezko 95 kaleratze, 22 pizgarridun baja eta hamabi aurre-erretiro izan dira.
Egun berean, greba mugagabean dagoen plantillako 70 bat langilek enpleguaren aldeko martxa bat abiatu dute Amurrioko lantegitik Gasteizeraino. Ostegun arratsaldean Murgian geldituko dira, eta, ondoren, Gopegira abiatuko dira, bertako kiroldegian gaua igarotzeko.
Arabako hiriburura ostiralean ailegatuko dira, eta, gainontzeko grebalariekin eta Aernnovako langileekin batera, kaleratzeen kontrako protesta eramango dute Eusko Legebiltzarrera, 9:00etan. Izan ere, Eusko Jaurlaritzako Ekonomiaren Garapen, Iraunkortasun eta Ingurumen sailburu Arantxa Tapiak EH Bilduren galdera bati erantzun beharko dio Tubacexen inguruan.
Greba mugagabea, aurrera
Une erabakigarria iritsi da Tubacexera, eta zuzendaritzak badaki. Izan ere, sindikatuek salatu dutenez, langileei banan-banan deitzen ari da enpresa, lanera joan daitezen.
Horren aurrean, enpresa batzordeak kalean geldituko diren lankideei babesa emateko deia zabaldu du, greba mugagabea eten ez dadin. "Denok gaude itsasontzi berean eta helburu berarekin: lanera itzultzea kaleratze traumatikorik gabe", azpimarratu dute. Gainera, deiak grabatzeko gomendatu die lankideei, telefonoaren bestaldeko solaskidea informatuz.