Joan den astean, Tubacexeko zuzendaritzak langileen ordezkariei jakinarazi zien EEEak Laudio (TTI) eta Amurrioko (Aceralava) lantegietako 129 pertsonari eragingo diela azkenean: horietatik, 95 nahitaezko kaleratzeak izango dira, 12 aurre-erretiroak eta 22 pizgarridun bajak.
Hasiera batean, zuzendaritzak 150 kaleratze proposatu zituen; ondoren, kopuru hori 136ra jaitsi zuen; egunotan, behin betiko kopuru hori aldatzen joan da, borondatezko pizgarridun baja gehiago adostu direlako. Hala ere, plan horietara heltzeko epea astelehen honetan amaituko dira.
Negoziazioek ez dute akordiorik ekarri, eta, beraz, enpresak laster ezarriko du espedientea. Bitartean, langileek greba mugagabean jarraitzen dute, eta dagoeneko 40 egun bete dituzte. Kaleratzerik onartuko ez dutela berretsi dute azken egunetan, eta, gainera, lanuzte eta mobilizazioekin batera, epaitegietan aurkaratuko dute EEEa.
Era berean, Tubacexeko langileen borrokaren eskakizun nagusietako bat erakundeen inplikazioa da —bereziki Eusko Jaurlaritzarena—, Aiaraldeko enplegua eta etorkizuna defendatzeko. Ildo horretan, astelehen honetan, ehunka herritarrek manifestazioa egin dute Laudion, eskualde osoko zein kanpoko enpresa batzordeek deituta. Laudioko Tubacexetik abiatu dira herriko plazaraino.
Honako hauek dira manifestaziora deitu duten enpresa batzordeak: Autoglas OPCO Laudio, Guardian Llodio, Amurrio Ferrocarril y Equipos, Envases, Imegar, Amurrioko eta Laudioko udaletako enpresa batzordeak, Berriak Supermerkatuak, Maderas de Llodio, Jauregui Muntaketa Mekanikoak, Inauxa, Deguisa, Jez, Vidrala - Aiala Vidrio, Tubos Reunidos, ITP - PCB eta Laudio Ikastola.
#NoSobraNadie#kaleratzerikez #aiaraldeaborrokan #AiaraldeaSalbaDezagun pic.twitter.com/JzTPsLcyGp
— TUBACEXenLUCHA (@tubace_xen) March 22, 2021