79 langileek balbulak ekoizten dituzte Aiaraldeko sare ekonomikoan paper garrantzitsua bete ohi duen Valvospain enpresako fabrikan. Zuzendaritzak ostegun honetan iragarri du langile guztien kaleratze kolektiboa ezarriko duen EEEa aurkeztuko duela.
Enpresaren egoera ekonomikoa txarra izan da azken urteetan. 2019ko ekainean, hartzekodunen konkurtsoan sartu zen, eta, ondoren, 2020ko martxotik aldi baterako lan-erregulazio espedientean (ABLEE) dago. Egoera horretan, langileek hiru hilabete eman zituzten soldata kobratu gabe; horri erantzuteko, hilabeteko greba egin zuten.
Ostegun honetan, espero zen albiste txarra iritsi da: prozesu konkurtsalak ez du aurrera egin, interesa agertu zuten hiru enpresetatik batek ere ez duelako seinale gisa jarri beharreko dirua ordaindu. Hortaz, Valvospainek Amurrion duen fabrikako 79 langileak lanik gabe geldituko dira.
Amurrioko lantegia Lazaro Ituarte izenarekin sortu zen 1928. urtean. Prozesu konkurtsalaren porrotaren ostean eta EEEa ezarri ondoren, ia mende bateko ibilbidea amaituko da.