20. urteurrena ospatzen ari da Laudioko Gaztetxea, baina ospatzeko aukera guztiak bertan behera gelditu dira, desalojoaren ondorioz. Ostegun honetan, Udaltzaingoak argia moztu zien, desalojo agindua jakinaraztearekin batera. Ostiral eguerdian, azkenik, udaltzainak bertaratu dira desalojoa gauzatzeko.
Laudioko Gazte Asanblada Gaztetxearen defentsan berretsi da, eta mobilizazioak iragarri ditu datozen orduetarako. Gertakariak salatzeko, larunbateko 12:00etan elkarretaratzea deitu dute, Herriko Plazan. Horrekin batera, Erraki Babes Sareak igandean Donostian eta Iruñean deitutako mobilizazioetara joateko dei egin du asanbladak; Okupazioaren kontrako ofentsibari autodefentsa! da maila nazionaleko bi manifestazioen leloa.
"Azken urteetako lanari jarraipena emateko prest gaude, eta hau hasi besterik ez da egin. Erasoen aurrean, Laudioko Gaztetxea aurrera!", adierazi du Laudioko Gazte Asanbladak sare sozialetan.
— Laudioko Gaztetxea (@LaudioGaztetxea) January 8, 2021
Udalaren erabakia
Gazte Asanbladako kideek Gaztetxea berriz irekitzea erabaki dute aste honetan, Laudioko Udalak hartutako erabakiaren aurka eginez. Izan ere, tokiko erakundeak erabaki du Kultur Etxeko azpiegiturak, Gaztetxea barne, 2023. urtera arte itxita mantentzea erabaki du, Aldundiak bertan egin nahi dituen obren bigarren fasea amaitu arte.
2019ko abenduan hartutako konpromisoan berretsi da Laudioko Udala. "Kultura Etxeko lanak amaitzen direnean, Gaztetxeko erabiltzaileei instalazioetara itzultzea bermatuko diegu, baina obrak amaitzen direnean", ziurtatu dute.
Laudioko Gazte Asanbladak, ordea, erabakiaren "arbitrariotasuna" salatu du. Kritikatu dutenez, Kultur Etxeko erakin multzoaren zenbait gune irekita mantenduko dituzte, hala nola KZ Gunea eta Euskaltegia. "Argi dago Gaztetxetik kanpo nahi gaituztela, eta espazioaren egoera helburu hori lortzeko aitzakia merkea baino ez dela", salatu dute.