Autu-mautuak Aiaraldeko eskualdean erabiltzen zen esapide bat da, "kontutxoak, kontatzekoak..." adierazteko. Izen hori daraman kanpaina bat jarri dute abian Berbalagun ekimenaren barruan.
Kanpaina, bereziki egokitu da itxialdi egoerara: astean behin hitzaldi moduko bat egongo da, laburra, 20 minutu ingurukoa, jarraian parte-hartzaileek galderak edo iritzi-trukaketak egiteko. Den-dena, etxetik mugitu gabe.
Gaiak era guztietakoak izango dira, eta dietista, kirolari zein artista boluntarioek eskainiko dituzte. Parte hartzeko nahikoa da ordenagailuan Jitsi aplikazioko Aiaraldeko Autu-mautuak estekan sartzea. Sarrera librekoak izango dira, edonorentzakoak.
Hurrengo saioa: maiatzak 20, asteazkena, 19:00-20:00 bitartean.
Gaia: Etxea: gure tradizioan, etxea eraikin bat baino askoz gehiago zen. Elementu sinbolikoa, euskal kulturaren oinarri nagusia. Goazen galdutakoa aurkitzera Felix Mugurutzaren eskutik.