alea.eus

Osasun bermerik gabeko haragia saltzen zuen sarea desegin dute

Erredakzioa 2018-05-21 11:53   Gizartea  Aiaraldea  Aiara

Aiaran behiak eta ardiak legez kanpo hiltzen zituen hiltegi baten aurkako operazioan zazpi lagun atxilotu dituzte.

Osasun bermerik gabeko haragia saltzen zuen sarea desegin dute
Partikularrei ez ezik, hainbat dendatan ere saltzen zuten haragia. / L. Budimaier - Unsplash | Ikusi handiago | Argazki originala

Legez kanpo aritzen zen hiltegi bat desegin du Ertzaintzak joan den ostiralean, Aiaran. Ustiategian batez ere behiak eta ardiak hazten eta hiltzen zituzten, eta gero haragi hori partikularrei eta hainbat tabernari eta janari-dendari saltzen zizkieten, administrazioaren kontrol sanitariotik izan gabe. Legez kanpo hildako abereen hondakin gehienak Burgos iparraldeko leize batera botatzen zituzten, Peña Angulo inguruan.

"Abereak Bizkaiko eta Kantabriako jabeek eskaintzen zituzten. Legezko merkatuan irteerarik ez zuten eta merkatu beltzean nolabaiteko etekina atera nahi zieten abereak" zirela zehaztu du Ertzaintzak, prentsa ohar batean. Sareak bost urte inguru zeramatzan jarduera horretan, eta ikertzaileek uste dute batez bestean bi behi eta hogeita bost ardi eta arkume merkaturatzen zituztela astero.

ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Izan zaitez ALEAkide.



Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa