Aiarako jaiak ospatuko dituzte apirilaren 27tik 29ra, San Prudentzio egunaren inguruan. Honez gain, Kuadrillako gainerako udalerrietan ere, Laudion, Amurrion eta Okondon ospakizunak izango dituzte. Amurrion eta Laudion bezperan egingo dute danborrada. Aiaran eta Okondon, aldiz, 28an bertan.
San Prudentzio Aiarako jairik garrantzitsuena da eta ostiralean hasiko dira ospatzen. Txupina 19:00etan jaurtiko dute Alday fundazioko kideek, eta Prontxi maskotari ongi etorria egingo diote, Luiaondoko txistularien laguntzarekin. Horrekin batera, dantzak, fanfarrea eta Sukar taldeak alaitutako berbena izango dira. Larunbatean haurren danborrada, 13:00etan, eta barraskilo jana izango dira protagonistak. Igandea kiroletan blai dator; Jesus Isasiren omenezko XXXVIII. Txirrindularitza Txapelketa, bolo-kojoa, eta pilota jaialdia izango baitira. Eguna amaitzeko, erromeria izango da Patxi eta Konpainiarekin, eta herriko odolki jana, 21:00etan.
Danborrada eta barraskiloak
Urtero bezala, Laudion, Rakatapla elkartea da San Prudentzioren omenezko danborradaren eta Barraskiloak Saltsan txapelketaren antolatzailea. Apirilaren 27an, danbor-hotsek Laudioko kaleak girotuko dituzte, iluntzeko 22:00etan Aldai Plazatik abiatuz. 24:00etan Herriko Plazara helduko da danborrada, eta San Prudentzioren omenezko Erretreta joko dute udal ordezkarien aurrean. Ondoren ikurriÒaren igoera egingo dute.
Ekhiotz Bilbao Rakatapla taldeko kideak azaldu duenez, 26 urte inguru dira danborrada antolatzen hasi zirenetik. Hasiera batean herriko elkarte eta txoko gehienek parte hartzen zuten, baina urteak aurrera joan ahala parte-hartzea murriztu zen. Egun 70 lagun inguru biltzen dira gaueko kalejiran. "Saiatu gara azken urteetan jende gehiago erakartzen, eta haurren danborradarekin ere elkarlanean aritu gara" kontatu du Bilbaok. Izan ere, egun berean, 17:30ean egiten dute danborrada txikia, herriko ikastoletako eta eskoletako ikasleek eta irakasleek. 19:00etan amaituko da kalejira, Herriko Plazan.
Bestalde, apirilaren 29an, Herriko Plazan, Barraskiloak Saltsan txapelketa gastronomikoaren XXVI. edizioa izango da; 09:00etan hasiko dira prestatzen, eta ondoren, 12:30 aldera, Rakataplako sukaldariek barraskiloen dastaketari hasiera emango diote. Bilbaoren hitzetan lan handia hartzen dute, baina oso egun polita da: "Denak batzen garelako, eta bide batez herria girotzen saiatzen gara".
Amurrion ere prest
Danborradak eta barraskilo-jan herrikoia izango dira Amurrioko Udalak antolatutako programazioaren ardatzak. Ostiralean, apirilaren 27an, 15:30ean hasiko da jaia, danborren erritmora, Musika Eskolak antolatutako umeen danborradarekin, Juan Urrutia plazan. Tabarre Fanfarrearen eta Amurrioko herritarren partaidetza izango duen danborrada nagusiari dagokionez, 20:00etan hasiko da, eta Juan Urrutia plaza eta erdialdeko kaleak hartuko ditu.
Bukatzeko, 20:15etik aurrera, barraskilo-jan herrikoia egingo dute Juan Urrutian. Euria izanez gero, jarduerak San Anton plazan egingo dira.
Okondogoieneko festa
2011. urtean berreskuratu zuten Okondon San Prudentzio jaia, eta ordutik, urtero, Okondogoieneko San Prudentzio ermitara igotzen dira herritarrak. 12:00etan hasten da meza, eta ondoren egingo dute hamaiketakoa eta igel jaurtiketa txapelketa. Trikitiaren soinuek lagunduko dute erromeria.