Aiaraldean euskararen normalizazioan elkarlanean aritzeko, bertako Euskalgintza Kontseilua sortu dute 40 erakundek, tartean hogei ikastetxe, kirol eta kultura taldeak eta euskara elkarteak.
Erakunde berriak adierazi du bere xedea dela Aiaraldeko euskararen normalizazioaren alde urratsak eman nahi dituzten eragile zein norbanakoen bilgune iraunkorra izatea, egiten den lanaren eraginkortasuna bilatzea, gogoetarako foroa osatzea, estrategiak gauzatzeko euskarriak sortzea, erreferente izatea eta instituzioekiko eta entitate pribatuekiko interlokuzio aktiboa izatea.
Ibilbide luzea
Eraketa batzarra pasa den ostiralean egin zuten (otsailaren 12an), Laudioko Kultura etxean, baina puntu horretara heltzeko, azken bi urteetan lan handia egin dutela adierazi dute Kontseiluko eledunek. Kontseiluaren funtzionamendu eta ezaugarritzea prestatzeaz gainera, azken bizpahiru hilabeteko egitekoa izan da elkarte ezberdinen atxikimendua eta parte-hartzea bideratzea, bai eta Aiarako Kuadrillako presiden-tearekin eta udaletako alkateekin zein euskara teknikariekin bilerak egitea egitasmoa aurkezteko eta Kontseilu honi babesa eman eta elkarlanean aritzeko gonbitea egiteko. Sustatzaileek adierazi dutenez, instituzioek harrera ona egin diote proiektuari eta datozen hilabeteetan Kontseiluaren eta 10 instituzio (Kuadrilla eta udalak) horien arteko elkarlan-esparrua zehaztu nahi dute.
Aiaraldeko Euskalgintzaren Kontseiluak maiatzean izango du hurrengo batzarra. Ordurako, talde eragileak 2016ko plangintza eta aurrekontua landu, elkartea legeztatu eta instituzioekiko hitzarmenak gauzatu nahi ditu.