Euskal Herriko Etxebizitza Sindikatu Sozialistak azaldu duenez, sindikatuan antolatuta dagoen pertsona bat eta haren familia Zaramaga auzoko etxebizitza batean bizitzen hasi ziren, jabeari alokatuz "abusuzko klausulak zituen kontratu baten bidez". 2023ko urtarrilean, jabeak etxebizitza erreklamatu zuen erabilera propiorako.
Sindikatuaren arabera, erabilera propiorako ustezko behar hori egiaztatzeko dokumentazioa eskatu zion familiak, baina jabeak ez zuen dokumenturik bidali; maizterrak alokairua ordaintzen jarraitu zuen, eta jabeak dirua onartzen jarraitu zuen. Antza denez, maiatzean jabea etxebizitzara joaten hasi zen, "familiari etengabe enbarazu, mehatxu eta eraso eginez". Horrez gain, etxeko jabeak birritan aldatu zuen trastelekuko sarraila, eta, ekainaren hasieran, txerri baten burua eta hankak agertu ziren etxeko atearen aurrean.
Desokupazio enpresa
Testuinguru horretan, uztailean, Desokupación Legal izeneko enpresa bat harremanetan jarri zen sindikatuko kidearekin, etxebizitzatik alde egiteko konbentzitzeko; familiak salatu duenez, "laguntza ekonomiko txiki bat" ere eskaini zioten. Irailaren hasieran, enpresaren pegatina bat agertu zen etxebizitzako atean.
Une batetik aurrera, familiako kideak irainak eta mehatxuak jasotzen hasi zen, telefono bidezko audioen bitartez. Mezu horietan, desokupazio enpresako solaskideek adierazi zuten arazoa irailean konpondu nahi zutela "gaitz handiagoak saihesteko". Etxebizitza Sindikatuak salatu duenez, astelehen honetan, irailaren 25ean, bi gizon agertu ziren atarian, familiari mehatxu eginez.
"Pertsona horiek etxera berriro joateko eta gure kidea eta haren familia indarrez kanporatzen saiatzeko arriskua dugu", ohartarazi dute. "Argi utzi nahi dugu etxegabetze saiakera legez kanpokoa dela, familia etxebizitzan bizi baita kontratuarekin eta alokairua ordainduta. Jabea, desokupazio enpresa hori kontratatzean, legez kanpoko etxegabetze bat egiten saiatzen ari da".
β οΈπππ¦π’ππ¨π£ππ ππ¨π₯π₯π ππππ‘ | πππ«ππ¦π π’π ππ’π₯π₯π’πππ§π¨
— Euskal Herriko Etxebizitza Sindikatu Sozialista (@EtxeSindikatua) September 26, 2023
β‘οΈDesokupazio enpresa batek familia bat etxegabetu nahi du Gasteizen.
β‘οΈHainbat mehatxu jasan ostean, argi diogu: itzultzen baldin badira, desokupako faxistei aurre egingo diegu.
[Abajo en Castπ] pic.twitter.com/Y0lu48ES9Q
Jarduera parapoliziala
Etxebizitza Sindikatuaren ustez, "argi dago desokupazio enpresa horien izaera faxista: jabe handiek eta, batez ere, jabe txikiek kontratatzen dituzte, legez kanpo eta parapolizialki jarduteko".
"Estatua iristen ez den lekura heltzen da faxisten indarkeria. Inpunitate osoz jarduten dute, bai okupazio kasuetan, bai maizterrak legez bizi diren kasuetan. Indar polizialek, instantzia judizialek eta administrazioek ahalbidetzen dituzte jarduketa horiek, prozesu orokor bat bultzatzen dutelako: proletalgoa errentagarriak ez diren etxebizitza modalitateetatik kanporatzea; ez ordaintzeagatiko etxegabetzeak exekutatuz edo enpresa horiei legez kanpoko jarduteko aukera emanez", salatu dute.
Gainera, sindikatuaren aburuz, "proletarioen kriminalizazioaren arduradun" dira desokupazio enpresa horiek, "txiroa kanporatzeaz gain, prozesu hori justifikatu eta defendatuko duen testuinguru sozial bat sortzen laguntzen baitute".
Premiazko asanblada
Gasteizko Etxebizitza Sindikatuak asanblada bat antolatuko du irailaren 29an, ostiralean, 19:00etan Zaramaga auzoko Fermin Lasuen kaleko 1. zenbakian, "berehalako arriskua dela eta". Horrez gain, antzeko egoeran dauden pertsona guztiei dei egin diete Euskal Herriko Etxebizitza Sindikatu Sozialistarengana jotzera. "Desokuparen aurrean, ez erakundeek, ez epaitegiek, ezta are gutxiago ere poliziek, ez baikaituzte defendatuko", ohartarazi dute.
