Gasteizko Udaleko Landa Eremuaren Zerbitzuak, Hontza Natura Elkartearekin elkarlanean, mirotz zurien bikote bat markatu du, besteak beste, geolokalizatuta izateko. Azken urteetan, nabarmen gutxitu da espezie horren populazioa, baita mirotz urdinarena ere: 2012tik, bikoteen %35 inguru galdu dira, eta azken hilabeteetan, baldintza klimatiko txarrak direla eta, txiten %25 inguru galdu dira.
Aurten egindako prospekzioan, mirotz zuriaren sei habia bakarrik topatu dituzte Araban, haietako bat Gasteizen; eta mirotz urdinaren 24, horietako bi Gasteizen.
Geolokalizazioa GPS trasmisore bidez egingo dute, eta horrek, besteak beste, informazio baliotsua eskainiko du kokapenari, bizi eremuei, migrazio ibilbideei, negutokiei eta errunaldiei buruz. Haien ohiturei eta biologiari buruzko ezagutza horiek lagungarriak dira espeziea babesteko. "Habien kokapena identifikatuta eta txiten bilakaera kontrolatuta, errunaldiak aurrera ateratzea berma daiteke eta, bestela, nekazariekin akordioak adostuta edo Martiodako Faunaren Suspertegira eramanda habiak babes daitezke", azaldu du Miren Fernandez de Landa Landa Eremuko zinegotziak.
2022an jarri zuten lehen GPS igorgailua bi mirotz urdin helduri. Arrari Gasteiz izena jarri zioten, eta Mendoza emeari. Ordutik ari dira bi horien jarraipena egiten. Aurten, berriz, bi mirotz zuri heldu markatu dituzte: emeari Landa izena jarri diote, eta arrari, berriz, Aberasturi. Egoera onean, osasuntsu eta ondo elikatuta zeuden; laster, uzta garaiarekin batera, habiatik txitak kenduko dituzte haien garapena Martiodako zentroan osatu eta gerora ingurune naturalean aske uzteko.