Bueltan da Gaztefilm Fest, Zinhezbak eta Kalakalabek antolatutako gazte eta umeentzako zinema jaialdia. Seigarren edizioa izango da aurtengoa, eta bi asteburutan zehar ospatuko da, azaroaren 18tik 27ra bitartean.
Egun horietan, lau film luze eta hemezortzi film labur eskainiko dituzte sail ofizialaren barruan, baita umeek egindako beste zortzi ikus-entzunezko ere. Gainera, haurrekin osatutako epaimahaia izango da aurtengo edizioan. Proiekzioak Salburua eta Zabalgana gizarte etxeetan, Artium Museoan eta Kubik aretoan izango dira, eta sarrerak Entradium plataformaren bitartez daude salgai.
Sail ofizialeko film luzeak Belle [Ryū to Sobakasu no Hime] (Mamoru Hosoda, 2021, Japonia), Kurrin [Oink] (Mascha Halberstad, 2022, Herbehereak), Princesse Dragon (Anthony Roux eta Jean-Jacques Denis, 2021, Frantzia) eta Wolfwalkers (Tomm Moore eta Ross Stewart, 2020, Irlanda) izango dira.
Euskara gehiago
Aurtengo edizioan euskararen presentzia areagotzeko apustua egin nahi izan du jaialdiak. Horregatik, proiektatuko diren film luze zein film laburretako batzuk euskarazko azpidatziak izango dituzte.
Gainera, euskarara bikoiztutako hainbat proiekzio izango dira. Azaroaren 20an, igandean, eta 26an, larunbatean, bi egunetan 12:00etan Zabalgana gizarte etxean, Zagreb Films. Atzera begira saioa eskainiko dute, Bigarren Mundu Gerraren ondoren Kroaziako Zagreb Films konpainiak sortutako animaziozko lau film laburrekin, hiru urtetik gorako umeei zuzenduta.
Halaber, azaroaren 20an, igandean, 17:30ean Salburua gizarte etxean, eta azaroaren 26an, larunbatean, 17:30ean Artium Museoan, Kurrin filma eskainiko dute euskarara bikoiztuta, Baionako ikastolarekin egindako elkarlanari esker. Lan hau sei urtetik gorako haurrei zuzenduta dago.
Bestalde, azaroaren 27an, igandean, 12:00etan Zabalgana gizarte etxean, hiru urtetik gorako umeei zuzendutako Kiriku eta Sorgina film frantsesa eskainiko dute euskarara bikoiztuta.