Arana, Judimendi, Adurtza, Txagorritxu, San Kristobal, Arriaga Lakua, Abetxuku-Mikelin, Zaramaga, Zabalgana, Zaharraz Harro eta Salburuko jai batzordeek agerraldi bateratua egin zuten joan den ostiralean, ekainaren 4an, Arana auzoko jaien testuinguruan, Gasteizko Udalak komun eramangarrien instalazioa ez finantzatzeko hartutako erabakia salatzeko.
"Gasteizko auzoetako jaiak auzo horietako eta hiri osoko bizilagunen topagune dira. Kalitate handiko jardueraz betetako datak dira, ilusioz beteriko boluntarioek baliabide gutxirekin antolatuak", azaldu dute. "Jai horiek arrakastaz egin daitezen, urte osoan zehar boluntarioak bilatzen, telefonoz deitzen edo hainbat kolektibori emailak idazten ari gara. Helburua da sor daitezkeen behar guztiei aurre egiten saiatzea: aseguruak, instalazio elektrikoak, azoka esparruak, bizilagunei abisua ematea, inprimategiak, kartelak...".
Gainera, joan den urteko maiatzean, jai batzordeek auzoetako jaietan komun kimiko eramangarriak instalatzeko eskatu zioten Udalari. Horren erantzuna ezezkoa izan zen arren, aurten berriz aztertuko zuela adierazi zuen. "Eskaera egiteko arrazoia bikoitza zen: jendeak kalean pixa egiteak dakarren zikinkeria saihestea, eta bestetik, emakumeak seguruak ez diren txokoetara joan behar izatea saihestea", aldarrikatu dute.
Aurtengo jaiak iritsi dira, baina jai batzordeek salatu dute Udalak ez diola erantzunik eman iaz hartutako konpromisoari. Kritikatu dutenez, aurten saileko teknikari arduradunari idatziz egindako eskaerek ez dute erantzunik izan. Horrez gain, gaiaren inguruko mozio bat onartu zuen udalbatzaren osoko bilkurak. "Hala ere, ez dute komunik jarriko, bozketa horretan ebatzitakoa derrigorrez bete behar ez dutela argudiatuz. Osoko bilkurak hiriko auzo elkarteek aurkeztutako mozio bat onartu zuen, baina Urtaranen gobernuak ez du egingo", deitoratu dute.
"Horrek argi utzi du zein den gure hiriko EAJren eta PSOEren gobernuaren jarrera herri-txandaren, herritarren parte hartzearen, osoko bilkuraren konpromisoen eta auzoetan egiten dugunaren aurrean. Espero dezagun erabaki hauetaz damutzera eraman ahal dien ezer ez gertatzea", ohartarazi dute.