Urritasun ugari eta sakonak dituzten 37 ume eta gaztek ikasten dute Gorbeialden, 3 eta 21 urte bitartekoak: garun-paralisia, autismoa eta askotariko sindrome ezintzaileak dituzte, arazo kognitibo, sentsorial eta motoreak eragiten dizkietenak. Gehienek ezin dute hitz egin, eta beste baliabide batzuen bidez komunikatzen dira. Begirada, arnas egiteko modua, giharren tonua… Pedagogia terapeutikoko irakasle David Malmiercak azaldu duenez, "ikasleek modu asko dituzte nola sentitzen diren adierazteko, eta horiek ondo ezagutzeko harreman estua landu behar da haiekin". Teknologia berrien laguntza ere badute, mota askotako komunikatzaileak baitituzte zentroan, besteak beste, marrazkien bidez adierazteko tresnak.
Ezintasun sakonak dituzte ikasleek, baina ahalmenetan jartzen dute indarra eskolan, Joana Aduriz ikasketaburuak nabarmendu duenez: "Oso inportantea da arreta ikaslearen gaitasunetan jartzea, eta ez horrenbeste ezintasunetan". Bat dator Maitane Fernandez de Retana pedagogia terapeutikoko irakaslea: "Egin ezin dezaketena baino, egin dezaketena da guri inporta zaiguna; zer gaitasun dituzte ikasleek? Horiek ahalik eta gehien garatzeko lan egiten dugu".
Irakurri erreportaje osoa Arabako ALEA aldizkariko 50. alean. Etxean jasotzeko, harpidetu hemen.