Hamar urte bete berri ditu Errigorak, eta udazkeneko kanpainari ekin dio duela gutxi, 10 urte bete-bete lelopean. Hamarkada bateko ibilbidea ospatzeko, saski bakarra osatu dute oraingoan, "originala, biribila eta biderkatzailea". Saskietan 23 ekoizleren bederatzi produktu ekologiko daude: bost produktu saski guztietan izango dira –zainzuriak, piperrak, orburuak, gozo bat eta alkoholdun botila bat–; eta beste lau ohiko produktuak dira, saskia osatzeko.
Urtez urteko helburu solidarioari eutsiz, saskien balioaren %25 Nafarroa hegoalde eta erdialdeko euskalgintzara bideratuko dute, AEK, Ikastolen Elkartea, Sortzen eta Agerraldia elkarteen bidez. Saskien prezioa 50 eurokoa da.
Nola egin eskaerak?
Urriaren 20an ireki zen eskaerak egiteko epea, eta azaroaren 9ra arte luzatuko da. "Modurik eroso eta eraginkorrena" eskaera online egitea dela azpimarratu dute Errigorako kideek, baina herriz herri aurrez aurre egiteko aukera izango da ere. Araban guztira 32 banaketa gune izango dira aurtengo kanpainan, Agurain, Amurrio, Aramaio, Dulantzi, Gasteiz, Kanpezu, Laudio, Legutio, Okondo, Trebiñu eta Zuian:
| LEKUA | HERRIA |
|---|---|
| Lautada Ikastola | Agurain |
| Lautadako AEK | Agurain |
| Pedro Lope Larrea Ikastola | Agurain |
| Amurrioko AEK euskaltegia | Amurrio |
| Aresketa Ikastola | Amurrio |
| Aramaioko Ekonomatoa | Aramaio |
| Dulantziko Errigora Gunea | Dulantzi |
| Adurtza Ikastola | Gasteiz |
| EH Bilduren egoitza | Gasteiz |
| Arana AEK | Gasteiz |
| Armentia Ikastola | Gasteiz |
| EHUko Arabako Campusa (LABen bulegoa) | Gasteiz |
| ELA sindikatua | Gasteiz |
| Hala Bedi Irratia | Gasteiz |
| Hizkuntza Eskola | Gasteiz |
| Koldo Mitxelena institutua | Gasteiz |
| LAB sindikatua | Gasteiz |
| Salburuko Auzo Elkartea | Gasteiz |
| STEILAS sindikatua (Manuel Iradier) | Gasteiz |
| Toki Eder ikastola | Gasteiz |
| Txagorritxuko Auzo Elkartea | Gasteiz |
| Zabalganeko Auzo Elkartea | Gasteiz |
| Kanpezuko Ekobasterra | Kanpezu |
| Eska Tailerra | Laudio |
| Ekintzen Faktoria | Laudio |
| Laudio BHI | Laudio |
| Laudio Ikastola | Laudio |
| Laudioko AEK | Laudio |
| El Mesón Taberna | Okondo |
| Legutio (guneko arduraduna) | Legutio |
| Trebiñuko udaletxea | Trebiñu |
| Zuiako Errigora gunea | Zuia |
Errigorak 10 urte
2013ko urriko egun batean, Iruñeko Nabarreria plazan dagoen Zabaldi Elkartasun Etxean agertu zen lehen aldiz Errigora, egitasmoaren asmoak aurkeztu eta Nafarroako hegoaldeko uzta euskarari puzka kanpainan parte hartzeko deia egiteko. "Nafarroa hegoaldekoak propio diren produktuak Euskal Herrian zehar zabaltzeko" eta "zonaldeko euskalgintzari ekarpena egiteko" xedea zuen egitasmoak.
Ordutik, urteez gain, 130.000tik gora saski bete dituzte Nafarroa hegoalde eta erdialdeko produktuekin, Euskal Herrian bertan kontsumi daitezen. Aldi berean, euskalgintzaren zakua ere oparo bete dute, 1.800.000 euro baino gehiagorekin, saskiek emandako mozkinekin.
Kanpainak joan kanpainak etorri, Errigoraren komunitatea etengabe eraberrituz joan da ekimenera batu diren boluntario, ekoizle, kontsumitzaile, bidelagun eta onuradun berriekin.