Matxoaren 9arekin batera, udaberriko kanpaina abiatu du Errigorak, Nafar hegoaldeko uzta, eskutik eskura — Bat egin Errigora Balioekin lelopean.
Izan ere, aurtengo kanpainan eskuratu ahal izango diren produktuek Errigora Balioak berme zigilu eta guzti izango dute, euskarazko ohiko etiketetan gehituta. Produktuak gutxienez lau balio dituela ziurtatzen du zigiluak: Euskara, Auzolana, Bertakotasuna eta Nekazariekiko harreman bidezkoa. "Bestela kontsumitzeko" dei egin du Errigorak: "Bertako elikagaien alde, euskaraz, auzolanean eta ekoizpenean harreman bidezkoak sustatuz".
Urtero bezala, ehunka boluntarioren lanari esker, eta AEK, Sortzen eta Ikastolen Elkartearekin batera, Euskal Herriko ehunka herritan egin ahal izango dira Nafarroa hegoalde zein erdialdeko olio, kontserba, lekale, arroz, fruitu lehor eta pasta eskaerak. "Produktu hauek eguneroko kontsumora ekartzeko eredu honi jarraikiz, despentsak urte osorako betetzeko unea da", ospatu du Errigorak, produktuen "kalitate bikaina" azpimarratuz.
Non egin daitezke eskaerak?
Eskaerak online egin ahal izango dira, eta herri edo eskualde bakoitzean puntu zehatz batzuetan jaso ahal izango dira (baita eskaria bertan egin ere). Martxoaren 29a baino lehen, Araban honako lekuetan egin edo jaso ahal izango dira:
| LEKUA | HERRIA |
|---|---|
| Lautada Ikastola | Agurain |
| Lautadako AEK | Agurain |
| Pedro Lope Larrea Ikastola | Agurain |
| Amurrioko euskaltegia | Amurrio |
| Aresketa ikastola | Amurrio |
| Aramaioko Ekonomatoa | Aramaio |
| Arana AEK | Gasteiz |
| Armentia Ikastola | Gasteiz |
| EHUko Arabako kanpusa (LAB-en bulegoa) | Gasteiz |
| Koldo Mitxelena institutua | Gasteiz |
| Salburuko auzo elkartea | Gasteiz |
| Toki Eder ikastola | Gasteiz |
| Txagorritxuko auzo elkartea | Gasteiz |
| Zabalganako auzo elkartea | Gasteiz |
| Kanpezuko ekobasterra | Kanpezu |
| Eska Tailerra | Laudio |
| Faktoria | Laudio |
| Laudio BHI | Laudio |
| Laudio Ikastola | Laudio |
| Laudioko AEK | Laudio |
| Legutio | Legutio |
| Trebiñuko udaletxea | Trebiñu |
| Zuiako Errigorako gunea | Zuia |