EHUko Gogo Elebiduna Ikerketa Taldea zahartze osasuntsuaren inguruko ikerketa batean murgilduta dago une honetan. Zehazki, zahartzen goazen heinean gure hizkuntza gaitasuna nola aldatzen den ikertzen ari dira, eta baita elebiduntasunak prozesu horretan duen eragina aztertzen ere.
Horretarako, 30 urtetik 80 urte bitarteko partaideak bilatzen ari dira, izan elebidunak zein elebakarrak. Hala ere, Alazne Sainz Gil de Paules ikerketa taldeko kideak azaldu duenez, "ahalik eta partaide elebidun gehien" topatu nahi dituzte, "tarte horretako adin guztietakoak".
Ikerketan parte hartu nahi duten lagunentzat formulario bat jarri dute martxan; betetzen duten pertsonekin harremanetan jarriko da Gogo Elebiduna taldea. Horrez gain, gogoelebiduna.partehartu@gmail.com helbide elektronikoa eta 945 01 42 94 telefono zenbakia erabili daitezke harremanetan jartzeko edota zalantzak argitzeko.
Micaela Portilla Ikergunean lan egiten duen Gogo Elebiduna Ikerketa Taldeak hizkuntza nola irudikatu eta prozesatzen den ikertzen du; batez ere, zeintzuk diren irudikatze eta prozesatze horren ezaugarri unibertsalak eta zeintzuk aldatzen diren hizkuntza bakoitzaren ezaugarrien arabera.