Arte eszenikoen Max sariek hogei kategorietako finalistak ezagutarazi dituzte, eta epaimahaiak UniKo lana aukeratu du Haurrentzako, Gazteentzako edo Familiarentzako Ikuskizun Onenaren kategorian, Gasteizko Teatro Paraiso taldearen lana. Harekin batera, kategoria honetan Cross Border Project taldearen La chica que soñaba; eta Laika, Obsidianak eta Xirriquiteula Teatrek sortutakoa.
Paraisoren izendapen hau "oso pozgarria" dela adierazi du Pilar Lopez konpainiako arduradunak: "Une zailenetan ere arte eszenikoekin eta kalitate goreneko sorkuntzekin topo egiteko eskubidea duen publikoarekin konprometituta jarraitu duen lantalde oso baten errekonozimendua da". Haur eta helduentzat familia-historia hau Iñaki Rikartek zuzendu du, eta Paul seme bakarraren eta bere etxeko erregearen istorioa kontatzen du, Irati ahizpa jaio arte. Gertaera horren ondorioz, maitatua izateari uzteko beldur intimoak familiaren egonkortasuna mehatxatzen du.
Protagonistaren atzean, Maite Bayon aktorea dago, eszenan Ainara Unanue eta Tomaas Fernaandez Alonso eta Aitor de Kintana lagun dituela, gaztelaniazko eta euskarazko bertsioetan. Bingen Mendizabalena da musika, eta eszenografia eta jantzi-lan zehatza Ikerne Gimenezek egin du, biak ere konpainiako ohiko kolaboratzaileak. 
Pez Limbo
Egile onenaren sarirako, berriz, Maria Goirizelaia zuzendaria hautatu dute Harri, orri, ar. El patio de mi casa obrarekin egindako lanagatik. Antonio C. Guijosa –Solo un metro de distancia– eta Fernando Delgado Hierro –Los remedios– zuzendariak izango ditu lehiakide. Arabako Pez Limbo konpainiaren lana da Harri, orri, ar, eta besteak beste, Josune Velez de Mendizabal aktore gasteiztarra aritu da lantaldean.