Emakumeenganako Indarkeriaren aurkako Nazioarteko Eguna asteazken honetan ospatzen da, azaroaren 25ean, eta Arabako Foru Aldundiak "gazteekin eta gazteentzat" sortutako sentsibilizazio kanpaina aurkeztu du. Musikaren hizkuntza unibertsala da kanpainaren ardatza, Aldundiaren ustez "gazteek beren sentimenduak aurkitzen eta erakusten" baitituzte bertan.
Horretarako, lau kartel sortu dituzte, Aske maite goiburupean gazte arabarrentzat oso ezagunak diren abestien pasarteekin; horien bitartez, kontrolaren zein lodifobiaren aurkako eta harreman sanoen aldeko mezuak zabaldu nahi izan dituzte. Gainera, adierazpen iraingarrien aurrean edo emakumea umiliatu edo kontrolatu nahi dutenen aurrean, ahalduntze mezuak nabarmendu dituzte.
Helburu horrekin, lau abesti erabili dituzte:
- Izaroren Libre: "Bizi nahi dut libre, zure legeen kontra, zure usteen kontra".
- Iekorako ETS taldearen Díselo ya: "Díselo, díselo ya, no está dispuesta. Díselo, díselo ya".
- Kai Nakai reggaetoi abeslari feministaren Kolpe: "Nahi dudana jantzi, gaur lagunok hautsi behar dugu gaua erditik".
- Valentziako Mafalda taldearen En guerra: "Cuánto ha de aguantar la mujer para que se le respete de una vez".
Gazteen erreferenteak
Kartel horietan lurraldeko gazteentzat erreferente diren bi gasteiztar agertzen dira: Paula Fernandez influencerra eta Kai Nakai reggatoi abeslari feminista. Biek parte hartu zuten iragan ostiralean Aldundiko jauregian egindako prentsaurrekoan, Nerea Melgosa Arabako Foru Aldundiko Giza Eskubideen eta Berdintasunaren zuzendariarekin batera.
Datu kezkagarriak
"Pandemia modu desberdinean eragiten ari da emakumeengan eta gizonengan", azaldu du Nerea Melgosak, eta plazaratu dituen datuek erakusten dutenez, "emakumeak eta neskak krisialdi honen ondorio negatibo gehiago jasaten ari dira diskriminazioari, indarkeriari eta eskubide urraketari dagokienez".
Aldundiaren inkesta batean galdetutako gazteen %42k esan du jeloskortasuna ona zela; %44k adierazi du konfinamenduan bikotekideak zer egiten ari zen erakusteko eskatu ziola; %88k azaldu du ariketa fisikoa egiteko eta argaltzeko presioa sentitu zuela konfinamendu garaian; eta %56k baieztatu du ez dela ondo sentitzen udan gorputza erakusten.
Bitartekoak Araba osoan
Bereziki gazteei zuzendutako kanpainaren bitartekoak gazteengandik hurbilago dauden guneetan kokatu dira, hala nola sare sozialetan edo komunitate eremuetan. Gainera, kartelak banatu dira Arabako kuadrilletan eta udaletan, baita emakumeen eta gizonen berdintasunaren alde lan egiten duten eta indarkeria matxista desagerrarazteko borrokatzen duten erakundeetan ere.
Halaber, Melgosak nabarmendu du kanpainaren barruan Arabako kirol klub profesionalen inplikazioa; izan ere, minutu batez isilik egongo dira azaroaren 25etik hurbil jokatzen diren partiden hasieran.
Era berean, LAIAeskolak genero indarkeriaren aurkako sentsibilizazio ekimenak ugaritu ditu bere azaroko programazioan.