2011ko azaroan estreinatu zenetik, ‘Gartxot’ film luzea Euskal Herriko zinema areto ezberdinetan egon da ikusgai. Oraingoan, etxean ikusteko aukera izango duzu, interneten, 2,95 euroren truke.
Horrela, pelikulak Arturo Campiónek 1917an idatzi zuen ‘Gartxot, Itzaltzuko bardoa’ liburua hartu du oinarritzat eta narrazioak egiten duen moduan, XII. mendeko bardo baten bizitza kontatzen digu: Bardo deitzen zaio herriaren oroimena eta kultura gordetzen duen kantariari. Eta horixe da Orreagako abade berriak nahi ez duena. Hargatik, Gartxot, bertako bardoa, deserriratu eta Mikelot, haren semea bahituko du latinez kantatuko duen fraide bihurtzeko. Baina Mikelotek ihes egingo du eta berriro hasiko da kantuan aitarekin, herriz herri. Elizak desafiotzat hartuko du kantaldi bakoitza eta soldaduak aita-semeen ehizan arituko dira, harik eta inguratu eta irtenbide bakarra utzi arte: tragedia. XII. mendean gaude, eta hasi da konkista aurreko konkista.
Campionek Zaraitzuko kondaira ilun eta nahasi batez baliatu zen narrazioa idazteko baina intentzio guztiarekin Nafarroako historian funtsezkoa izango den toki eta garai batean kokatuko zuen: XII. mendeko Orreagan. Gartxot euskararen aldeko garrasi bat ere bada, baina orobat, Nafarroako konkista eta akulturizazio prozesuak nola eta zeinen eskutik gauzatu ziren erakusten digu.
Filma sarean ikusteko: www.filmin.es (2,95 euro).
Iparraldetik eta mundutik ikusteko: Filmotech.com
Frantses, Ingeles, Espainol, Galego eta Katalanezko azpitituluekin ikusteko aukera ematen du.
Trailerra
{vimeo}31900691{/vimeo}