24 urte betetzear zituela entzun zuen lehenengo aldiz hitz aldrebes hori, non eta bere etxeko patioan. Gustuko egin berehala, iradokitzailea begitandu. Etxeko bazter guztiak jendez gainezka zituen, eta ezin zien jaramon handirik egin taula gainean zeudenei, baina halako batean hitz magikoa aditu zuen: genetxortake, eta burua jiratu zuen oholtzarantz.
Zertan ari ziren? Zeintzuk ziren, mikrofonoa hartuta, gonbidatuei barre algarak, barren barrenetik, ateratzen zizkietenak? Zergatik bildu ote zen horrelako jendetza atzokoan bere etxean?
24 urte betetzear, eta ospakizunetan buru belarri murgilduta zeuzkan etxekoak, etxeko gazteenak; bazen astebete ospakizunen egitarau luzeari hasiera eman ziotela, eta atzokoan bete-betean asmatu zutela iruditzen zitzaion, sekulako giroa eta jendea sartu ezinik, ezin kabiturik.
Dedio!
Orduan konturatu zen nork, nori, zer eta zergatik… Bere etxeko “plazan”, taulagainean, mikrofonoei atxikita, kantuan ari zitzaizkionak bertsolariak ziren. Eta ez nola nahikoak!
Antzeman zituen Andoni Egaña, Maialen Lujanbio, Unai Iturriaga, Julio Soto, Eneko Abasolo eta Ander Solozabal. Baita Unai Elizasu ere, denen buru eta gidari.
Oraingoan portatu ziren gazte etxekalte halakoak! Gitarra elektrikoak eta burrunba hotsak alde batera utzi, rocka, postrocka, neokorea eta hardpostneotrasha alboratu eta ulertzeko moduko kantoreak ekarri. Hizkuntzarekin jolasean ibilita, elkarri ferekak egin, elkar zirikatu, ostikadak eman, ukabilkadak jaso, musuak jaurti, belarriondokoak hartu...
Horrela aritu ziren ordu t’erdi luzean bertsolariok, eta Gaztetxea bera, bere egitekoak deskuidatuta, gonbidatuei jaramon egin barik, anfitrioi lanak utzita, 24. urteurreneko ekitaldi horri itsatsita, engantxatuta... Kantatzen ari zirenen errimak eta hitz jokoak ulertzeko lanetan...
Genetxortake, aditzekin jolasean, solasean, “txortan egin genezake?“...Ummm!! Gustatu zaio proposamena eta joan da gela ilunera ea baten batekin zerbait egiten duen...
Iritzi zutabeak
ALBISTEAK MUGIKORREAN
ALEAren albisteak Whatsapp edo Telegram bidez jaso nahi dituzu?
WHATSAPP: Bidali ALEA hitza 645 66 86 02 telefono zenbakira.
