Hitzaldiak, flora mikologikoa biltzeko txangoak eta erakusketa mikologikoa izango dira Gaubeako protagonistak urriko hirugarren asteburuan; izan ere, 'Mikologia, aldaketa klimatikoaren aurrean' tituluarekin antolatu dute bertan elkarte mikologikoen lehen topaketa. Zalduondoko Zizegorri elkartea, Artzena mendilerroko talde mikologikoa, Haroko (Errioxa, Espainia) Toloño elkartea eta Miranda Ebroko (Burgos, Espainia) Centro de Estudios Micologicos izan dira topaketa antolatzen ibili direnak, Espejoko eta Barrioko batzar administratiboen laguntzarekin, eta herriko landaetxeen eta tabernen babesarekin.
Hilaren 21ean, 19:00etan, bilduko dira topaketan parte hartzera animatzen diren elkarte mikologiko guztiak, Espejoko gizarte etxean, eta ordu bete beranduago, 20:00etan, lehen hitzaldia izango da, Eneko Otxoa Larringan Aleovitro enpresa bioteknologikoaren eskutik. Aleovitro punta-puntako enpresa da, eta oso espezializatuta dago in vitro landareen hedapena ikertzen eta desagertzeko arriskuan dauden espezieak berreskuratzen.
Erakusketa Espejon
Larunbatean, urriaren 22an, goizean, zizak eta onddoak bilduko dituzte gonbidatuek arratsaldetik aurrera zabalduko duten erakusketa osatzeko. Alta, ez da ohiko bilketa izango, Lurgaia natur ondarearen kontserbaziorako eta kudeaketarako fundazioko Jon Hidalgok lagunduko baitie, eta inguruko basoen egoeraren inguruan hitz egingo du. Ondoren, 18:00etan, bildutako aleak sailkatuko dituzte, eta erakusketa zabalduko da, Espejoko gizarte etxean. Gainera, 20:00etan, hitzaldia antolatu dute, Miranda Ebroko Micolosa ikerketa taldeko kide Luis Abadia Diezen eskutik.
Igandean amaituko da Gaubeako topaketa. Goizean, flora mikologikoa biltzeko bigarren txangoa egingo dute, Barrio inguruan, eta arratsaldean, berriz, lehen jardunaldi mikologikoen balorazioa izango da.
Elkarte mikologikoen Gaubeako lehen topaketa honetan izena emateko epea zabalik dute antolatzaileek eta informazioa ere eskuratu daiteke 630 87 35 46 eta 691 54 96 12 whatsapp zenbakietan.