Arabako hondakinen %75 inguru sortzen du Gasteizek. Horregatik, bilketan eta kudeaketan markatzen dituen joerak eragin erabakigarria dute lurralde osoan. Guztira, 95.614 tona hondakin sortu zituzten 2022an gasteiztarrek, eta 376 kilo urtean gasteiztar bakoitzak.
Oro har, aurreko urteetako hondakin kopuru berdina sortu du hiriburuak, nahiz eta oraingoan nahastutakoen ehunekoa nabarmen jaitsi den. Halaber, gaikako bilketa mota batzuetan hazkunde handia eman da –lehenbizikoz, konpostatzeko erabiltzen diren inausketen hondarren bilketa kontuan hartu da–, eta horrek hondakinen bilketaren kalitatea hobetzea ahalbidetu du. Alta, datu positiboen aurrean, txostenaren balantzean jasotzen da gaikako bilketa %38koa dela soilik, eta gainerako %62 nahasitako zaborra. Arabako Hondakinen Behatokiak gogoratu duenez, 2025rako berrerabiltzearen eta birziklatzearen helburua %55era iristea da: "Beraz, hiru urteren buruan hamazazpi puntuko igoera eman behar da, eta hori ez da lortuko azken urteetako abiadurari eutsiz gero".
