Berantevillako lantegian iragarritakoa baieztatu du Aernnovako zuzendaritzak. Enpresa aeronautikoak Araban duen lantoki nagusian otsailaren 1etik aurrera ezarriko duen enplegua erregulatzeko espedienteak (EEE) langileen %22ri eragingo die; hau da, gaur egun dituen 454 langileetatik 100 ingururi.
Jardueraren %37ko jaitsiera eta 42 milioi eurotik gorako aurtengo galerak argudiatu zuzendaritzak. Langileen ordezkarien arabera, "egoera koiunturala" da eta aeronautikaren sektore osoari eragiten dio; sindikatuen ustez, ez dago justifikaziorik "neurri estruktural eta traumatikoak" ezartzeko. Kaleratzeak ez diren beste aukera batzuk daudela aldarrikatu eta Jaurlaritzaren inplikazioa eskatu dute.
Nolanahi ere, kaleratzeak 2021eko otsailaren 1etik aurrera gauzatuko dira. Era berean, lantegian geratuko diren langileen %15i aldi baterako lan erregulazio espedientea (ABLEE) ezarriko diete otsailaren 1etik abenduaren 31ra arte, "ahal den neurrian enpleguari eusteko".
Aernnovak nazioarteko plantillaren %20ko murrizketa iragarri zuen uztailean; orduan, 950 langile kaleratzeko asmoa aurreratu zuen orduan, horietatik 650 espainiar estatuko lantegietan. Enpresa taldeak zortzi planta ditu Araban, Miñaoko Parke Teknologikoan —kaleratzeak hasi dira bertan ere—, Gamarran, Legution eta Berantevillan; azken hori, Aernnovaren plantarik garrantzitsuena da.