Altsasu eta Miranda Ebro artean aldiriko tren zerbitzua martxan jartzeko eskatuko dio Aguraingo osoko bilkurak Eusko Jaurlaritzari. Era berean, zerbitzu hori kudeatuko duen operadorea Euskotren izatea galdegin dute, eta geraleku berriak ezartzeko aukera aztertzea, "bereziki industria guneetan".
Aguraingo udalbatzak gogoratu du "larrialdi klimatikoko egoera batean ezinbestekoa dela mugikortasun eredu jasangarriagoa sustatzea, kalitatezko garraio kolektibo eta publikoa sustatuz". Gainera, Europako trenbideak liberalizazio fase batean murgilduta daudela nabarmendu du udalak, eta, beraz, "ez dago oztoporik Renfe ez den beste operadore batek, Euskotrenek, esaterako, aldiriko zerbitzua emateko Miranda-Gasteiz-Altsasu korridorean".
Raul Lopez de Uralde Aguraingo alkateak gogorarazi du horrelako zerbitzu batek udalerriko mugikortasuna hobetzen lagunduko lukeela, eta, gainera, herritarrei eta industrialdean lan egiten dutenei kalitatezko zerbitzua eskaintzea ahalbidetuko lukeela.