Proiektu soziosanitario, parte-hartzaile eta komunitarioa da, non Iruraiz-Gaunako herritarrak izan diren proiektuaren ardatz. Udalarekin batera, Bexen Cardio enpresak —Ermuan kokatutako kooperatiba, 40 lagunek osatuta— koordinatu du proiektua, 24 orduz erabilgarri egongo diren desfibrilagailuak instalatuz, formakuntza jaso duten boluntarioen erreskatatzaile sare bat sortuz eta bihotz-biriken geldialdi bat emanez gero biktima ahalik eta bizkorren artatzeko herramintak erreskatatzaileen eskura jarriz.
Hamaika desfibrilagailu
Instalatutako desfibrilagailuak kalean jarri dira, 24 orduz erabilgarri eta eskuragarri egon daitezen. Izan ere, erantzuteko azkartasunak biktimaren suspertzeko aukerak nabarmen areagotzen ditu. Bihotz-biriken geldialdi bat jasan duen pertsona batek bizirik irten ahal izateko, sei minutu igaro baino lehen artatu beharra dago. EAEn, 2018ko datuen arabera, anbulantzia batek batez beste hamaika minutu behar ditu biktimarengana heltzeko. "Desfibrilagailuak kalean instalatzeko erabakia hartzerakoan datu hori erabakigarria izan zen", azaldu dute ekimenaren sustatzaileek.
70 erreskatatzaile
Udalak desfibrilagailuaren eta bihotz-biriken bizkortzean oinarritutako doako formakuntzak jarri ditu herritar guztien eskura, eta formakuntza horiek harrera oso ona izan dute, 70 boluntarioz osatutako erreskatatzaile sarea sortu baita.
Boluntarioek jaso duten formakuntzak hiru ordutakoak izan dira, eta instalatutako desfibrilagailuak nola erabiltzen diren eta bihotz-biriken bizkortzean oinarritu dira. Gainera, praktika errealitate birtualaren bidez egiteko aukera izan dute.
Aplikazioa
Bukatzeko, erreskatatzaile komunitatea osatzen duten 70 lagunei Reanibex Alert aplikaziora sarbidea eman zaie desfibrilagailuekin konektatuta egon daitezen. Reanibex Alert aplikazioak, bihotz-biriken geldialdi baten aurrean, erreskatatzaileen sarera bideratuko ditu alertak, gertaeraren berri emateko eta haien parte-hartzea koordinatzeko, baita puntu geografiko zehatza koordinatzeko ere, geolokalizazioaren bidez. Modu horretan, erreskatatzaileak biktimarengana joango dira ahal den neurrian lagundu ahal izateko.