Azaroan jaio zen Georgia O’Keeffe artista. Horregatik, eta Pessoak eta biok Harrimena lantzeko ariketak adosten ditugun lekuan margolarien egutegi bat dugulako, badira aste batzuk O’Keefferen margolan bat eta aipu bat deika ari zaizkigula: "Interesa bizitzako gauzarik garrantzitsuena da; zoriontasuna behin-behinekoa da, baina interesa etengabekoa da".
Eta baiki, urteen etorriarekin batera, handitzen ari zaizkit interes metak. Pilatzen. Ez beti modu ordenatuan. Gero eta gauza gehiagok pizten didate interesa. Gero eta handiagoa da –goia jotzetik urrun dirudien– nire jakin-mina. Mundua gainbehera betean doa, nabarmen, eta bakan batzuk egunero –eta egunerokoarekin– miresten. Hori bai txundigarria, motel!
Laster utziko dugu atzean Georgia O’Keeffe egutegian –Kandinsky etorriko da abenduan–. Halarik ere, geurean jarraituko dugu Pessoak eta biok, Harrimena lantzeko ariketak sail honetan. Ikusten. Ikasten. Eta, osasuna lagun, etengabekoa den bizitzarekiko interesa metatzen.
Edu Zelaieta Anta.
Iritzi artikulu hau argitaratzean, ALEAk ez ditu bere gain hartzen egileak adierazitako iritziak, ezta horiekin lotutako erantzukizunak. Zure iritzia bidali nahi baduzu, idatzi erredakzioa@alea.eus helbide elektronikora.