Ez galdetu niri azaroez,
martxoez,
emakumeez.
Nik erantzunda,
bestaldez zipriztindutako isla
miresgarrian murgilduko gara.
Galdetu, nahi baduzu, Akilesen koleraz,
Ovidioren erbesteaz,
maitatzen ikasteaz.
Ez galdetu niri haurrez,
gazteez,
zaharrez.
Nik erantzunda,
iraganaren eta geroaren arteko fikzio
borobilduan sartuko gara.
Galdetu, nahi baduzu, heldutxo izateaz,
boterearen adinaz,
biziaren konplexuaz.
Ez galdetu niri migratzaileez,
basamortuez,
txarrantxez.
Nik erantzunda,
ezagutu gabeko kartografia
lauan ibiliko gara.
Galdetu, nahi baduzu, gauaren epelaz,
legearen gozoaz,
europarron lotsaz.