Txagorritxu Ospitaleko larrialdietako zerbitzuko langileek manifestazioa antolatu dute, astearte honetan, hilaren 7an, 11:00etan hasita. Txagorritxun, azken hamar astez, egunero, langileak egiten ari diren kontzentrazioekin bat egiten du manifestazioak.
"Herritar guztien laguntza behar dugu, borroka hau guztiona delako", esan dute langileek; eta azpimarratu dute "arreta segurua eta kalitatezkoa eskaini ahal izateko" langile gehiago behar direla larrialdietako zerbitzuan. Txagorritxu Ospitaleko sarrera orokorrean hasiko da manifestazioa eta Eusko Jaurlaritzan amaituko da.
Langileak falta dira Osakidetzako larrialdi zerbitzuan. Hala salatu dute langileek, eta ziurtatu dute plantilla murrizten ari dela. Batez ere, Arabako eta Gipuzkoako koordinazio zentroetan dago arazoa.