alea.eus

9,6 milioi euro Santa Barbara plaza eraberritzeko

Erredakzioa 2017-04-03 15:49   Gizartea  Gasteiz

Parterreak kenduko dituzte, irisgarritasuna hobetzeko, eta Posta kalearen zatia oinezkoentzat bihurtuko dute. Obrak irailean hasiko dira.

9,6 milioi euro Santa Barbara plaza eraberritzeko
Santa Barbara plazak izango duen itxura berria. | Ikusi handiago | Argazki originala

Santa Barbara plaza eraberritzeko lanak irailean martxan jarriko ditu Udalak. Dagoeneko Tokiko Gobernu Batzarrak onetsi du inguru hori eraberritzeko lanak kontratatzeko dosierra; 9.659.843,55 euroko aurrekontua du, eta gauzatzeko epea 15 hilabetekoa izango da. Zenbateko horretatik, 255.115,30 euro AMVISAren hornikuntza sarea berritzeko izango dira, eta 429.838,15 euro saneamendurako. Aparkalekua berritzeko aurrekontua hiru milioi euro ingurukoa da.

Santa Barbara plazan egingo diren lanen artean, inguruko trafikoa hobetzeko lanak egingo dira, eta Posta kalean, esaterako, 80 metroko luzera izango duen pergola bat jarriko dute, 48 saltoki jartzeko lekuarekin. Helburua merkataritza ardatz hori dinamizatzea izango da.

Era berean, lanak kontratatzeko administrazio-baldintzen agiriaren azalean El Corte Ingles saltokiaren zamalanak lurperatzea aurreikusi dute. Egingarria bada sartuko da lan hori, Eusko Jaurlaritzaren aurrekontuari gehitutako partidaren bidez (800.000 euro). Espazio Publikoaren Sailak lurperatzearen proiektua idatziko du orain, eta honek hiru baldintza bete beharko ditu: bideragarritasun teknikoa, ekonomikoa eta administratiboa. 

 

Hiru berdegune

Zehazki, Udalak Posta kalea oinezkoentzat bihurtuko du Santa Barbara plazatik igarotzen den zatian, Urriaren Hamabia kalearen espaloia zabalduko du, eta parterre gehienak kenduko ditu. Posta eta Bake kaleen arteko bidegurutzean, pasabide goratua jarriko da, eta Bake kaletik Posta kaleraino doan zatia erdi oinezkoentzat izango da.

Azken diseinuan, plazak hiru berdegune handi izango ditu. Mendebaldean,  El Corte Inglesetik hurbilen dagoen aldean, landareak jarriko dituzte, eta eserleku luze bat ere jarriko da. Atseden hartzeko gunea izango da.

Ekialdean ere eserleku luzea duen beste berdegune bat kokatuko dute, eta haurrentzako jolasak jarriko dira. Berdegune horretan landare atlantikoak (mahastiak eta fruta-arbolak barne) landatuko dira. Hirugarren berdegunea, aldiz, Azoka plazaren ondoan kokatuta egongo da.

Azoka plazaren aldean, Santa Barbara plazara ematen duen irteera berria egokituko da, eskailerez eta arrapalaz osatua, eta horrek mahaitxoak jartzeko aukera emango die gastrotabernei.  

Aparkalekua, argiztapena eta saneamendua

Aparkalekuari dagokionez, osorik eraberritzeko eta honen irisigarritasuna hobetzeko asmoa du Udalak. Ibilgailuak Bake kalera aterako dira, Posta kalean barrena. Erabiltzaileen sarbideei dagokienez, orain dauden bi sarbideen ordez (batek igogailua du), lau sarbide jarriko dira (eta bitan izango da igogailua). Bide batez, bizikletak aparkatzeko eremu bat sortuko da, baina oraindik ez dute kudeaketa-sistema zehaztu.

Gasteizen egiten ari diren beste obra garrantzitsuetan bezala, Udalak inguruneko argiztapena hobetzeko baliatuko du aukera, oraingo argien ordez led teknologia instalatuz, eta AMVISAren saneamendu eta hornikuntza sarea ere berrituko ditu.

Erantzunak

Erabiltzailearen aurpegia Martin Rezola 2017-04-10 12:57 Erantzuna | #1

Albisteak ez ditu aipatzen plazako benetako protagonistak: zuhaitzak. “Berdeguneak” esaten da, “parterreak” ere bai, baina nik ez dakit zuhaitzik kenduko duten eta, kentzekotan, zein. Gure agintarien arborizidiorako eta hormigozaletasunerako grina ezagututa, ez naiz askorik fio. Aldaketa baldin bada oraingo zuhaitzen ordez belar aromatiko batzuk jartzea, a ze negozio kaxkarra…

Santa Barbara plazak natur ondare handia baitauka zuhaitzetan. Paseo bat eman nahi?

Azokaren eraikinaren ondoan, hiru hagin zabalek, ginkgo batek eta astigar palmatu exotiko horietako batek konposizio liluragarria egiten dute, niri “lorategi zen” horietako bat gogorarazten didana, batez ere urtarotik urtarora kolore-aldaketa zoragarriak eratzen dituenean.

Corte Inglés aldera joz, bi magnolia bitxi daude (hostoen aurretik loreak botatzen dituzten horietakoak); araukaria bat, eskola-umeen taldeen bisita didaktikoak mereziko lituzkeena, bertatik bertara ikus dezaten nolako zuhaitzak bizi ziren dinosauroen garaian; ondo-ondoan, bospasei altzifres handi batzuk, kanposantuetan ageri diren horietakoak, hostaje trinko itxia dela-eta txori askoren babestokia eta habialekua.
Hemendik Posta kale alderantz, sahats negarti handi batzuk. Hauek bai, hauek “sakrifikatzeko” prest nengoke, asko hazten baitira denbora gutxian, eta edozein parketan ugari aurki daitezkeelako.

Amaitzeko, Batzokiaren aldeko zerrendan, hagin gehiago, Judasen arbola, kupresazeo herrestari horietakoak, urkiak, arteak… sekulako biodibertsitatea, itzal fresko eta trinkoa eskaitzen duena.

Gurean, kultur ondareari, zorionez, gero eta balio handiagoa aitortzen zaio (imajinatzen, Armentiako baselizaren ataripean Mc Donals bat?, Ez, ezta?). Natur ondarea, aldiz, oso ahaztua dugu, greentasunak greentasun. Santa Barbara plaza oasi txiki bat da hiriaren erdian, lorategi botaniko txiki bat, ia-ia. Hegaztientzat ere bai, begi-belarriak erne dituen edonor jabetu daitekeenez (gero harrituko gara hirietatik betiko txolarre arruntak desagertzen direlako…).

Baina landareetatik txorietara pasa naiz, ia konturatu gabe. Bueltatu nadin, beraz, hasierako puntura. Plaza erreformatu behar bada, kendu dezatela erdiko urmaela, kendu ditzatela parterre batzuk, baina errespetatu ditzatela bertako zuhaitz ederrok. Jakin dezagun haien balio naturala, kulturala eta estetikoa estimatzen.

«Defender el árbol es defender la Tierra, la inocencia, la cultura y la belleza y todo aquello que no tiene voz ni armas para defenderse.» (Ignacio Abella, http://www.elcorreodelsol.com/blog/ignacio-abella )

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa