alea.eus

Oiertxo SOS plataforma aurkeztu dute

Erredakzioa 2017-03-15 13:00   Gizartea  Gasteiz

Oier Gomez presoa etxeratzeko helburarekin aurkeztu dute gaur Oiertxo SOS plataforma. Gogorarazi dutenez, oso larria da Gomezek duen gaixotasuna. 

Oiertxo SOS plataforma aurkeztu dute
Oiertxo SOS plataformaren aurkeztu dute gaur | Ikusi handiago | Argazki originala

Agerraldian adierazi dutenez, Gasteizko presoak "Ewing motako sarkomak ditu bizkarrezurrean, buruan eta aldakan. Ez dago modu egokian tratamendua jasotzen". Meaux-Chauconin-Neufmontiers espetxean dago Gomez, Parisetik gertu. Plataformak adierazi duenez, gaixo dagoen heinean, Gomezek etxean beharko luke egon. Hortaz, "legea bete dezala" eskatu diote Frantziako Estatuari.

Azken egunetan jakin izan dutenez, Gomezek bizkar hezurrean daukan sarkoma murriztu egin da, aldakakoak berdin jarraitzen du baina burukoa handitu egin zaio. Hau dela eta kimioterapia sesioak  bi izatetik hiru izatera pasako dira eta erradioterapia buruko sarkomari zuzenduagoa izango da. Datorren astean erabakiko dute medikuek buruko sarkoman ebakuntza egiten dioten edo ez.

Plataformak dei egin die Arabako eta Euskal Herriko herritarrei mobilizatu daitezen. Apirilaren 22rako "elkartasun eguna" antolatu dute Gasteizen, eta ostegunero 19:30ean egingo dituzte elkarretaratzeak, Iparralde gizarte etxearen aurrean.

Sare plataformak ere deitu du manifestaziora preso gaixoen eskubideen alde. Apirilaren 8an izango da martxa, Gasteizen. Martxoaren 25ean, berriz, Baionan egingo dute protesta, Bagoaz kolektiboak deituta, Gomezen eta gainerako preso erien alde. 22 dira gaixotasun larriak dituzten euskal presoak.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa