Gizarte Politiken eta Osasun Publikoaren zinegotzi Peio Lopez de Munainek udalaren laguntzak kontrolatu eta kudeatzeko abian jarritako neurri berrien balantzea egin du gaur. Eman dituen datuen arabera, Gasteizko Udalak 365.936 euroko iruzurra atzeman zuen 2014. urtean; zehazki, 97 lagunek egin zuten iruzurra, %2,3k. 2015ean, berriz, irregulartasunen bat egin zutenen ehunekoa %1,8ra jaitsi zen; 4.435 eskatzailetik 77k egin zuten iruzurra. Gaineratu duenez, 36.773 euroko iruzurra atzeman zuten 2015. urtean.
Peio Lopez de Munainen arabera, "datu horiek erakusten digute iruzur-portzentajea txikia dela. Ez da batzuek ikusarazi nahi diguten bezain handia, eta gainera, bada laguntzen kontrola". Horren haritik, Gizarte Politiken zinegotziak PPren diskurtsoa ukatu du. "Laguntzak ez dira neurriz ateratzen ari. PPk ezkutatzen du langabezian dauden gasteiztarren % 44k bakarrik jasotzen dituztela langabezia-prestazioak, eta gure hiriko 9.600 langabek ez dutela laguntza hori jasotzen. Normala da laguntza eskatzea, bizi ahal izateko".
Lopez de Munainek azaldu duenez, iruzurrari aurre egiteko azken urtean hainbat neurri eta ekintza jarri dira martxan. Besteak beste, dosierrak osatzeko behar diren datuak (Gizarte Segurantzari, Ogasunari eta abarri dagozkionak) eskuratzeko aplikazio informatiko bat lantzea, beste administrazio publiko batzuek utzitako datuak eskuratzeko aukera ematea, Lanbiderekin eta Gurutze Gorriarekin koordinatzea, eta abar.