Samaniegoko udalak 70 eguzki panelez osatutako zentral fotovoltaikoa jarri du herriko kiroldegian. Azpiegitura berriak 36kW-eko kontsumo partekaturako aukera emango du, udalak ohar batean adierazi duenez.
Lan horietan 37.750 euroko inbertsioa egin dute. Pili Garmendia alkatearen esanetan, azpiegitura berriak "udal gobernuak trantsizio energetikoarekin eta klima aldaketaren aurkako borrokarekin duen konpromisoa" adierazten du.
Ez da urte amaierarekin batera herrian bukatu duten obra bakarra. Izan ere, aisialdirako espazio berri bat atondu dute Konstituzio eta Las Heras kaleen artean dagoen udal jabetzako lurzati batean. 300 bat metro koadroko eremu horretan lorategi pergola bat jarri dute. Horrez gain, zoladura aldatu, irisgarritasuna hobetu, ureztatze automatikoa jarri eta bankuak zein paperontziak paratu dituzte bertan. Lan horiek 35.000 inguru euroko kostua izan dute.