alea.eus

Aurten ere, Korrika propioa egingo dute eskualdeko euskaltzaleek

Juanma Gallego 2017-03-30 10:42   Euskara  Arabako Errioxa  Guardia

Apirilaren 1ean Bastidatik eta Vianatik aterako dira korrikalariak, Guardian elkartu, eta batera Lapuebla de Labarcan amaitzeko

Aurten ere, Korrika propioa egingo dute eskualdeko euskaltzaleek
'Denok' lelopean, Viana eta Arabar Errioxako Korrikaren bigarren edizioa egingo dute larunbatean. | Alea. | Ikusi handiago | Argazki originala

Aurtengo Korrika Arabako Errioxatik igaroko ez denez, eskualde horretako herritarrek bigarren aldiz antolatu dute Korrika propioa. 2013an egin zuten, aurrenekoz, Viana eta Arabar Errioxako Korrika. Urte horretan, Korrikaren antolatzaileek esan zieten Korrika ez zela eskualdetik pasatuko, baina saiatuko zirela 2015eko edizioaren ibilbidearen barruan sartzen. Hala izan zen. Baina aurten ezinezkoa izan da, eta, hortaz, bigarren aldiz antolatu dute ekimena Arabako Errioxan.

"Tira, badakigu urrun gaudela, baina Euskal Herrian gaude, eta, Korrika ez bada pasatzen, euskararen alde zerbait egin dezakegula pentsatu dugu", azaldu du Arabar Errioxako Euskatzaltzaleak taldeko Joana del Hoyok.

Ibilbide bikoitza antolatu dute. "Bi zutabetan aterako gara, bata Bastidatik eta bestea Vianatik. Guardian batuko gara eta, bi zutabeek bat eginda, Lapuebla de Labarcan bukatuko dugu ekitaldia".

Goizeko hamaiketan Bastidatik aterako den zutabeak Abalos, Mañueta, Samaniego, Leza, Nabaridas eta Paganos zeharkatuko ditu. Bestalde, 09:00etan Vianatik ateratzen direnek honako ibilbidea egingo dute: Moreda, Labraza, Gorrebusto, Oion, Ekora, Binasperi, Lantziego, Kripan eta Bilar. "Badakigu gutxi garela, baina, era berean, asko garela ere aldarrikatu nahi dugu", dio Del Hoyok.

Arratsaldeko 18:00etan egingo diete ongietorria korrikalariei, Lapuebla de Labarcako Plano enparantzan. Lekukoaren mezua irakurri eta gero, Unai Bengoetxea eta Orlando Arreitunaindia arituko dira bertsotan. Umeentzako askaria eta helduentzako pintxo dastaketa izango da ere, eta Oiongo Irule eta Trikizio taldeek musikaz alaituko dute giroa.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa