Gasteiz Antzokiaren aldeko Plataformak Izaskun Arrue kulturgunea irekitzeko aldarria eraman du gaur Armentiako zelaietara. Plataformako hainbat kidek eskuorriak banatu dituzte Armentiako jai gunearen sarreran, San Prudentzioren estatuaren parean.
Gasteiztarrei helarazitako informazioan, plataformak berretsi ditu Lazarraga kultur elkarteak aurreko egunetan zabaldutako ideia nagusiak. Hala, Gasteizko Udalaren "borondate faltak" proiektua "kolokan" jarri duela salatu dute.
"Ia bi urte igaro dira Oihaneder Euskararen Etxeak ateak itxi zituenetik", gogora ekarri dute. "Bi urte gasteiztarrak kulturgune euskaltzalerik gabe, ehunka jarduerez gozatu ezinda, eta erreferentziazko lekurik gabe".
Plataformaren esatetan, udalak ezin dio orain Lazarragari "errua" egotzi. "Udala da bere konpromisoak bete ez dituena", argudiatu dute. Bestetik, berretsi dute udalak Lazarragari bidalitako jakinarazpenean ez direla zalantzan jarri elkarteak aurkeztutako fakturak eta ordainagiriak. "Elkarteak kudeaketa ekonomiko ona eta zuzena egin du. Non dago arazoa orduan?", galdetu dute. Hori dela eta, "aitzakia gehiagorik" jarri ez eta aferari "konponbidea orain" eman diezaiola galdegin diote udalari.