Denboraldiko ametsa izan da hasiera batetik Baskoniarentzat Euroligako zortzi onenen artean sailkatzea eta, gaur arratsaldean izan duten lehen aukeran, kale egin dute gasteiztarrek. Maccabi askoz ere sendoago aritu da partida osoan zehar, eta Baskonia berriz oso ahul defentsan. Goi mailako saskibaloian ezinezkoa da garaipenik lortzea, arerioaren erasoa gelditzerik ez baduzu; eta hala gertatu da gaurkoan.
Porrot mingarria, eta lehen aukera zaborretara bota du Baskoniak. Ostiralean izango du hil ala biziko azken aukera Efes eta Virtus taldeen arteko kanporaketako garailearen kontra. Nekeak pilatzen hasi da talde gasteiztarra denboraldiak aurrera egin ahala, eta agerian geratu da gaurko partidan.