Zeru hodeitsuek segida izango dute gaur, batez ere Araba ipar eta erdialdean. Hegoaldean hodeitza arinagoa izango da, eta batez ere arratsaldean Lorenzo azalduko da. Euri txikia ere etor daiteke hodei horiekin batera. Haizea ipar-mendebaldekoa izango da, ahul-bizia, eta zenbaitetan gogorra. Tenperaturak atzo hasitako bidetik joango dira, hiriburuan 6 eta 12 gradu artean egongo baitira.
Biharko ez da demaseko aldaketarik espero: zeru hodeitsuekin jarraituko dugu lurralde gehienean, tarte oso hodeitsuekin. Arratsalde partean, baina, garbiago egongo dela diote meteorologoek. Hala ez bada, bota errua beraiei, gizarteari edo ukiezina den beste asmakizunen bati. Eolo lasaiago ibiliko da, ahul-biziki. Termometroetan, antzera ibiliko dira alde termikoak: 5 eta 12 gradu artean.