Arabako lurretan ibili den Itzuliko laugarren etapan ezbeharra izan da. Oleta eta Kruzeta arteko bidean gertatu da erorikoa, Aramaion; dozena bat txirrindulari jausi dira, lasterketako faborito nagusienak tartean, eta proba gelditu behar izan dute zauritutakoak artatzeko. Horien artean, Frantziako Tourreko azkeneko bi edizioak irabazi dituen Jonas Vingegaard (Visma) txirrindularia eraman behar izan du anbulantziak.
Ondorioz, neutralizatu egin dute Legution amaitu den proba; denborak ez dira kontuan hartuko eta ez da bonifikaziorik izango. Ihesaldiko seiak bakarrik aritu dira etapa irabazteko lehian, eta Louis Meintjes izan da garaile.