Arabako Foru Aldundiak Deportivo Alavesen babesletza berreskuratuko du denboraldi honetan, ALEAk jakin duenez. Bi erakundeen artean sinatutako hitzarmenaren arabera, aldundiak 300.000 euro emango dizkio kirol taldeari lehen mailako bigarren denboraldian aldundiaren publizitatea agertzeagatik. Marka zehazki zertan izango den ez dute argitu hitzarmenean, "AFAren publizitatea egotea" baino ez delako aipatzen.
Babesletza nagusia kamisetaren alde batean marka egoteagatik izango da. 200.000 euroan zenbatetsi dute publizitate hori. Horrez gain, paseoko ekipazioetan ere marka egongo da (50.000 euro). Azkenik, prentsa aretoko atzeko aldean zein markagailuetan ere agertuko da aldundia, bakoitzagatik 25.000 euro ordainduta.
Besteak beste, 2016/17 denboraldian aldundiak kamisetaren marka nagusia izan zuen, Rioja Alavesa logotipoarekin eta atzeko aldean Visit Araba/Alava esaldiarekin. Atzeko lelo hori 2017/08 denboraldian mantendu zen, eta geroko denboraldietan sorbaldara igaro zen. 2021ean, berriz, diputazioaren marka kamisetatik desagertu zen, erakundeak aurreko urtean emandako 600.000 euroko babesletza berritu ez zuelako.