Hodeiak izango ditugu tarteka, eta, noizean behin euria egin ahalko du ere, batez ere eguerdian eta arratsaldean. Hego-mendebaldetik ibiliko da haizea, eta, bolada gogorrak izango dituen arren, momentuz Euskalmetek ez du abisurik eman —bai ordea, kostalderako; abisu horia daukate bertan—. Tenperaturak zertxobait jaitsiko dira, Gasteizen eguneko tartea 8 eta 17 gradu artean kokatuko baita.
Asteburuan antzerakoa izango da giroa, eta udazken kutsua mantenduko dela dirudi. Goibel eta hodeitsu egongo dira zeruak gehienetan, baina ostarteak ere zabalduko dira. Batez ere igande goizean egon daiteke garbiago. Larunbatean euririk ez dugula izango dio Euskalmetek; AEMET, berriz, baiezkoan dago. Hego haize indartsuak larunbatean zein igandean segida izango du, baina tenperaturek pittin bat gora egingo dute, asteburu osoan 10 eta 19 gradu artean ibiliko baitira.