Lehendakariak asteartean jakinarazitakoaren arabera, "gizartean lortutako immunitate-maila handiari esker", Eusko Jaurlaritzak indargabetu egingo du pandemiari aurre egiteko ikastetxeei zuzendutako Covid protokoloa. Horrenbestez, eta neurrien berri emateko ikastetxeei Hezkuntza Sailetik bidalitako gutunean adierazten denez, "normaltasun osoz lan egitea" eskatzen zaie.
Neurriak bertan behera geratzen diren arren, Hezkuntza Sailak hainbat gomendio zehaztu ditu: ikasgelak behar bezala aireztatzea, txertaketari buruzko gomendioak jarraitzea, eskuak sarri garbitzea eta sintomak izatekotan zaintzea. Halere, Hezkuntza Sailak gaineratu du gomendio horiek eguneratu egingo direla "behar izanez gero".
Aldiz, garraio publikoan herritar guztiek bete beharreko arauari jarraituz, eskola garraioan ere maskara jantzita eraman beharko dute sei urtetik gorako ikasleek.