JARE DANTZA TALDEA

Amaiurren eroritakoak gogoan izan dituzte

Erredakzioa 2022ko uzt. 19a, 12:21

Jare dantza taldeak Araba ordezkatu du gotorlekuaren erorialdiaren mendeurreneko ekitaldian.   

Joan den larunbatean Amaiurko gazteluaren setioaren amaiera oroitu zuten Nafarroa Garaian, bost mende igaro baitira Gaztelako soldaduek Nafarroako erresumaren erresistentziaren azken gotorlekua mendean hartu zutenetik. 

Bertan egindako ekitaldian, herrialde desberdinetako dantzariak izan ziren. Arabaren partetik, Jare dantza taldea bertaratu zen. "Goizeko hamaikak aldera, kanpaiak jotzen hasi ziren, eta dantza talde guztiak kale nagusian sakabanatzen hasi ziren", azaldu du Jare dantza taldeko Endika Saez de Adanak. Talde bakoitzak bere herrialdeko dantza bat egin zuen. Arabarren kasuan, Villabuenako paloteado bat dantzatu zuten. "Zehazki, dantza horren aldaera bat egin genuen; Arabako Errioxan eta Nafarroako zenbait herritan oso zabalduta dagoen dantza mota bat da. Makil txiki batekin formazio desberdinetan jotzen da".

Ondoren, gaztelua zegoen gailurrera igo ziren, orain monolitoa dagoen lekura. "Bertan egin zen ekitaldi nagusia. Besteak beste, beasaindarrek Nafarroako banderarekin dantza moduko bat egin zuten, eta Nafarroako ereserkia abestu zuten". 

Ez zen izan asteburuko hitzordu bakarra, igandean Baztandarren Biltzarrean parte hartu baitzuten. "Baztango herri bakoitzak karroza bat prestatzen du, eta kalejiran ateratzen dira. Ez da izan aurreneko aldia joaten garena, eta, beti bezala, oso ondo tratatu gaituzte", nabarmendu du dantzariak. Amaiurreko ekitaldia "solemneagoa" izan bazen ere, igandekoan jai giroa izan zen nagusi. 

BIDEOAN: Beasaingo dantzariak, Amaiurko ekitadian. Irudiak: Jare dantza taldea.

ALBISTEAK MUGIKORREAN

ALEAren albisteak Whatsapp edo Telegram bidez jaso nahi dituzu?

WHATSAPP: Bidali ALEA hitza 645 66 86 02 telefono zenbakira.

TELEGRAM: Batu zaitez @ArabakoALEA kanalera.


ALEA da Arabako euskarazko aldizkari bakarra, eta zu bezalako irakurleen babesa behar du aurrera egiteko. Zuk ere gurekin bat egin nahi al duzu?


Izan zaitez ALEAkide