Beroaldiak jarraituko du datozen egunotan. Eguneko lehen lainoak altxatuta, zerua oskarbi mantenduko da gehienetan. Goizean, gainera, haizeak hegoaldetik joko du. Arratsalderako, ipar-ekialdetik egingo du. Tenperaturek goranzko joera mantenduko dute: 17 gradu gutxienez, eta 33 gehienez Gasteizen. Alerta horia eman du Euskalmetek horregatik. Ohi bezala, hegoaldean beroa gehiago nabarituko da.
Bihar are okerragoa izango da egoera, eta Euskalmetek alerta laranja eman du: une honetan 18-34 gradu arteko aldea iragartzen du euskal meteorologia agentzia publikoak, baina, modu berean, ohartarazi du 37 gradutara hel daitekeela erdialdean, eta 39 gradutara Arabako Errioxan. Haizeak bezperaren bidetik joko duela uste dute: hegoaldetik goizean, baina ipar osagaia hartuko du arratsaldean.