Iñaki Arriola Lurralde Plangintza, Etxebizitza eta Garraioetako sailburuak aste honetan iragarri duenez, Espainiako Gobernuak dekretu bidez iragarritako %30eko deskontuaz gain, Eusko Jaurlaritzak %20ko beste deskontu bat ezarriko du EAEko garraio publikoko abonu guztien prezioa %50 jaisteko. Horrela, BAT Txartelaren hileko prezioa 30 eurokoa izatetik 15 eurokoa izatera pasako da.
Oraingoz, prezioaren murrizketa irailaren 1etik aurrera aplikatzea aurreikusi dute, eta horretarako izapideak abiatu ditu Eusko Jaurlaritzak. Espainiako Gobernuaren %30eko diru laguntza jaso nahi duten erakundeek Garraio Ministerioari eskaera aurkeztu behar diote uztailaren 31 baino lehen.
Gaur egun, 5 urte arteko adingabeek ez dute autobusa ordaindu behar, eta 6 urte artekoek dohainik erabili dezakete tranbia. Gorka Urtaran Gasteizko alkateak joan den astean adierazi zuen garraio publikoa 12 urtetik beherakoentzat doakoa izatea proposatuko zuela.