25 urte bete dira Juanma Bajo Ulloa zuzendari gasteiztarrak Airbag pelikula aurkeztu zuela, bere ibilbidean hirugarren film luzea. Aurrekaririk gabeko arrakasta komertzial bihurtu zen: 2.500.000 ikusle eraman zituen aretoetara, 1.200 milioi pezeta lortu zituen, eta ordura arte gehien ikusitako ekoizpena izan zen estatuan, Almodovarren Mujeres al borde de un ataque de nervios eta Fernando Truebaren Two Much filmen aurretik. Umorez, parodiaz, gehiegikeriaz eta gagez betea, garaiko gazte belaunaldi oso batekin konektatzea lortu zuen.
Urtebetetzea ospatzeko, filmaren bertsio luze baten proiekzioa antolatu dute, zinema aretoetan inoiz ikusi ez diren zortzi minutuko metrajea gehituta. Emanaldian lanaren protagonistetako batzuk izango dira. Bajo Ulloarekin batera, Karra Elejalde eta Gorka Aginagalde aktoreak eta Bingen Mendizabal filmeko musikaren arduraduna arituko dira. Ekitaldia ostiral honetan izango da, uztailaren 8an, 20:00etan, Vital Fundazioa Kulturunean.
Gainera, emanaldira joaten direnek, Vital Fundazioa Kulturuneako hallean, filmarekin zerikusia duten piezen erakusketa aurkituko dute, horietako asko publikoak orain arte inoiz ikusi ez dituenak, hala nola filmaketaren, filmaren eta hainbat bitxikeriaren irudiak digitalean; parekorik ez duen fotokromo jokoa; sustapen-materiala; kamisetak; posterrak edo zuzendariak filmatzean erabilitako jatorrizko klaketa.