Euskal Zinemaren 33. Astea izango da aurtengoa, Vital Fundazioaren eskutik. Larunbatera bitartean, euskal profesionalek 2016an zuzendu edo ekoitzitako zinema lanik onenetariko batzuk ikusi eta saritzeko aukera izango dute ikus-entzuleek. Egunero, 20:00etan hasita, film labur bat eta film luze bat eskainiko dituzte.
Besteak beste, Iratxe Mediavillaren Argi, Patxo telleriaren Igelak eta Felix Viscarreten Vientos de la Habana film luzeak ikusteko aukera izango da, eta Kepa Sojoren Hileta edota Mikel Ruedaren Caminan laburrak. Filmak ikusi eta gero, zinema aretora bertaratutakoek botoa emateko aukera izango dute, film luze edo labur onena aukeratzeko. Sarituen izenak larunbateko amaiera ekitaldian ezagutaraziko dituzte. Halaber, Gutako Ba' saria emango diote zinemaren munduko Arabako profesional entzutetsuren bati.