Lizar loreduna (Fraxinus ornus) ez da batere zuhaitz arrunta Iberiar Penintsulan, Valentzia inguruan salbu. Gurean, aldiz, Euskal Herrian, ez da inon ageri; gertuen daudenak Burgosko Oñako mendietan bizi dira.
Harik eta, duela hiru bat urte, Arabako botanikari prestigiotsu batek susmo txarra hartu zion arte lizarren lerrokako antolaerari. Izan ere, dokumentazio zaharra ondo aztertu, eta ondorioztatu zuen zuhaitzak ez zirela berez basatiak, norbaitek landatuak baizik, eta gero bai, beren kasa naturalizatu eta, are, hedatu egin zirela sakanean barrena (Oñako populazioak bezala, bide batez esanda).
Lizar loreduna Florida parkean
Zer ondorio izan ditzake horrek? Bada, paradoxikoki, babesik handiena merezi izatetik erauzi beharreko espezie inbaditzaile izatera pasa daitekeela, egun batetik bestera. Zerutik infernura. Giza-kondizioaren metafora bat; kirolari batzuei gertatzen zaienaren irudia; politikari zenbaitek bizi duen gainbeheraren isla; zuri eta niri umorea egun batetik bestera aldatzen zaigunean bezala. Nolanahi ere, lizar loreduna lorategi eta parkeetan ere ikusten da, ez dago Badaiaraino joan beharrik. Florida parkean badugu bat, eder askoa. Aprobetxatu eta gozatu, oraintxe dago-eta loraldi betean!
Informazio gehiago: Arabako Natur institutua
Egilea: Martin Rezola