Herriko intimitatean ospatu dituzte Kuartangon herri inauteri tradizionalak eta Agate Deuna, aspalditik bat egiten dutelako ospakizunek bailaran. Goizean, herriko txikienak eskean atera dira, etxez etxe, Agate Deunaren koplak abestuz. Arratsaldean, berriz, Hartzaren bila atera dira kuartangarrak, inauterietako larru, joare eta mozorroak jantzita. Ehizatu ondoren, artzaiak katez lotuta eraman du herriko kaleetatik, porreroak zainduta; eta bainuetxearen plazan, suaren inguruan, biribilean jarri dira denak, herriko autoritateen aurrean, dantzan eta kantuetan, Arrianoko Atsoak ardoa berotzen zuen bitartean.
Argazkiak: PHOT.OK