Goizeko lehen ordutik hasi da girotzen Uribarri Gaubeako frontoian hilabetero egiten den tokiko ekoizleen merkatua. Abendukoa bereziagoa izaten da, ohi baino ekoizle gehiago izaten direlako bertan, eta azken urteetan, Euskararen Egunarekin batera jarduera bereziak ere antolatzen direlako.
Añanako Kuadrillako Euskara Zerbitzuaren eskutik, Arai konpartsa izan da aurten Gaubean. Umeentzako buruhandiak egiteko lantegia egin dute udal liburutegian, eta arrakasta handia izan du jarduerak. Eguerdi partean, berriz, buruhandi txikiek konpartsako erraldiak lagundu dituzte frontoitik eliza pareko plazara egin duten kalejiran.
Erraldoiekin, buruhandiekin eta musikarekin batera, abenduko nobedadea Basotik-Valpuesta proiektuaren aurkezpena izan da. Valpuesta herriko ogi-labea berriro martxan jarri dute Idoia Perez Garciak eta Hodei Arrausik, eta lehen artisau ogi ale ekologikoak aurkeztu dituzte merkatuan.